Gen 32 | NdeIBE | STEP | UJakhobe laye wabamba eyakhe indlela, wasehlangabezwa yizingilosi zikaNkulu-nkulu.

Genesis 32

UJakhobe ulungisela ukuhlangana lo-Esawu

1 UJakhobe laye wabamba eyakhe indlela, wasehlangabezwa yizingilosi zikaNkulu-nkulu. 2 Wathi ezibona uJakhobe wathi, “Le yinkundla kaNkulunkulu!” Waseyibiza leyondawo ngokuthi yiMahanayimi.

3 UJakhobe wathuma izigijimi ukuba zihambe phambili kwakhe kumnewabo u-Esawu elizweni laseSeyiri, ilizwe lika-Edomi.

4 Wabalaya wathi, “Nanku okuzamela likutsho enkosini yami u-Esawu: “Inceku yakho uJakhobe uthi bengihlezi loLabani, ngahlala khona kuze kube manje. 5 Ngilezinkomo labobabhemi, ngilezimvu, lezimbuzi, njalo ngilezinceku lezincekukazi. Khathesi-ke sengithumezela leli ilizwi enkosini yami, elokuthi sengani ngingafumana umusa kuwe.”

6 Kwathi izigijimi sezibuya kuJakhobe zathi, “Siyile kumfowenu u-Esawu, okwamanje uyeza uzekuhlangabeza, ulamadoda angamakhulu amane eza lawo.”

7 UJakhobe waba lokwesaba lokukhathazeka okukhulu wasesehlukanisa phakathi abantu ayelabo baba ngamaqula amabili, wenzenjalo lemihlambini yezimvu leyezinkomo lamakamela lawo.

8 Wakhumbula wathi, “Nxa u-Esawu angafika ahlasele elinye iqula, leloqula eliseleyo lingahle libaleke.”

9 UJakhobe wasekhuleka wathi, “O Nkulunkulu kababa u-Abhrahama, Nkulunkulu kababa u-Isaka, O Nkosi, wena owathi kimi, ‘Buyela elizweni lakini lasezihlotsheni zakho, ngizakwenza uphumelele,’ 10 mina kangiwufanelanga wonke umusa lokuthembeka okutshengise inceku yakho. Ngangiphethe induku yami zwi mhla ngichapha leli iJodani, kodwa manje sengingamaqula amabili.

11 “Ngiyakhuleka ngithi ngisindise esandleni somfowethu u-Esawu, ngokuba ngiyesaba ukuthi uzakuza angihlasele, kanye labesifazana labantwababo. 12 Kodwa wena uthe, ‘Ngempela ngizakwenza uphumelele ngenze lezizukulwane zakho zibe njengetshebetshebe lolwandle elingeke labalwa.’ ”

13 Wahlala khonapho ngalobobusuku, kwathi kulokho ayelakho wakhetha isipho sikamnewabo u-Esawu: 14 izibhuzikazi ezingamakhulu amabili lezimpongo ezingamatshumi amabili; izimvu ezinsikazi ezingamakhulu amabili lezinqama ezingamatshumi amabili;

15 amakamela amasikazi angamatshumi amathathu lamathole awo; amankomokazi angamatshumi amane lezinkunzi ezilitshumi; kanye labobabhemi abasikazi abangamatshumi amabili lemiduna yawo elitshumi.

16 Wakugcinisa izisebenzi zakhe konke, yilowomhlambi wema wodwa, wathi kuzo izisebenzi zakhe, “Hambani phambili kwami, njalo litshiye ibanga phakathi kwemihlambi.”

17 Lowo owayephambili wamlaya wathi, “Nxa umnewethu u-Esawu ekuhlangabeza afike abuze athi, ‘Ungokabani wena, njalo uya ngaphi, njalo ngezikabani zonke lezizifuyo eziphambi kwakho? 18 Ubokuthi, “Ngezenceku yakho uJakhobe. Ziyisipho esithunyelwe inkosi yami u-Esawu, laye uyeza nje emuva kwethu.’ ”

19 Walaya njalo isisebenzi sesibili, lesesithathu lazo zonke ezinye ezaziqhuba imihlambi wathi: “Libokutsho nto yinye ku-Esawu nxa lihlangana laye. 20 Njalo lingakhohlwa ukuthi, ‘Inceku yakho uJakhobe uyeza ngemuva kwethu.’ ” Ngokuba wacabanga wathi: “Ngizamthoba ngalezi izipho engizithumela phambili; muva, nxa sengimbona, mhlawumbe uzangemukela.”

21 Yikho izipho zikaJakhobe zahanjiswa phambili kwakhe, kodwa yena wasala ezihonqweni bonke lobobusuku.

UJakhobe Ubindana loNkulunkulu

22 Ngalobobusuku uJakhobe waphakama wathatha omkakhe bobabili, lezincekukazi zakhe zombili kanye lamadodana akhe alitshumi lamunye wawela izibuko likaJabhoki.

23 Esebachaphisile umfula wasethi kakuweliswe yonke imfuyo yakhe. 24 Ngakho uJakhobe wasala yedwa, kwathi indoda ethile yabindana laye kwaze kwaba semathathakusa.

25 Leyondoda yathi ngokubona ukuthi kayimehluli yamxhakalaza enyongeni uJakhobe, inyonga yakhe yakhumuka elokhu ebindana laleyondoda. 26 Indoda yasisithi, “Ngiyekela ngihambe ngoba sekusile.” Kodwa uJakhobe wamphendula wathi, “Kangisoze ngikuyekele uhambe ngaphandle kokuthi ungibusise.”

27 Indoda yambuza yathi, “Ungubani ibizo lakho na?” Wathi, “NginguJakhobe.”

28 Yikho indoda yase isithi, “Ibizo lakho kalisayikuba nguJakhobe, kodwa u-Israyeli, ngokuba usutshukane loNkulunkulu kanye labantu wanqoba.”

29 UJakhobe wathi, “Akungitshele ibizo lakho.” Kodwa waphendula wathi “Ulibuzelani ibizo lami na?” Wasembusisa khona lapho.

30 Yikho uJakhobe wabiza indawo leyo ngokuthi yiPheniyeli esithi, “Kungoba ngimbonile uNkulunkulu ubuso ngobuso, kodwa impilo yami kayilinyazwanga.”

31 Ilanga lamphumela esethi udlula ePheniyeli, ehamba eqhugezela ngenxa yenyonga yakhe. 32 Yikho nje kuze kube lamuhla ama-Israyeli kawayidli inyama elomsipha osuka enyongeni, ngoba inyonga kaJakhobe yenyeliswa eduze lomsipha.